வாடகை வீட்டுவாசிகள்

ஒவ்வொரு தடவை
வீடு மாறிச் செல்லும் போதும்
தட்டு முட்டு சாமான்களோடு
சொந்த வீடு வாங்கும் கனவையும்
தூக்கிக் கொண்டு செல்கிறோம்.

அப்பாவின் ஹெர்குலிஸ் சைக்கிளும்
இரு கோணி பைகளில் அடங்கிவிடும்
சமையல் பாத்திரங்களும்
அம்மாவுக்கு சீதனமாக வந்த
ஒரு மர பீரோவிற்குள்
சில முறை தைக்கப் பட்டும்
பல முறை துவைக்கப் பட்டும்
அந்துருண்டை வாசத்தில்
வாசம் செய்யும் எங்களது
சட்டை டவுசர்களும் தான்
புது வீட்டிற்குள் எங்களோடு வரும்
மொத்த உடைமைகள்!

ஒவ்வொரு குடியேற்றத்தின் போதும்
பழைய துணிமணிகளின் உட்பொதிவில்
பொலிவுப் பெறும் புதிய தலையணைகள்!

அவரவர் பொருள்களை
அவரவர் தூக்கிச் சுமந்தே
வீட்டை நிறைத்துவிட்டு
மறுநாள் பால் காய்ச்சி 
அண்டை வீடுகளோடு
புதிய உறவு கொண்டாடும்
நாங்கள்
அகதிகளின் லட்சணங்களையும்
நாடோடிகளின் கூறுகளையும்
ஒருங்கே பெற்ற
வாடகை வீட்டு வாசிகள்!

நாங்கள் வசித்த வீடுகள்
அதே கதைகளைத்தான் திரும்பவும்
கேட்டுக்கொண்டிருக்கிறதாம்...!
சொந்தவீடு வாங்கும் கனவுகளை
புதிய மனிதர்களின் சொல்லாடலில்.